Innarluutit Pillugit Ilisimasaqarfik Siunnersuisarfiutigisoq
Tusilartut naapisimaarnissaannut peqataasut siulianut sanilliullugu amerlaneroqaat.
Tusilartut naapinnerat 2011 nuna tamakkerlugu Sisimiuni Knud Rasmussenip Højskoliani ullumikkumiit aallartinnaaqaaq.
Tusilartut naapisimaarnissaannut atatillugu ukiunut siuliinut naleqqiullugit aatsaat taama amerlatigisut peqataasussanngortut, Innarluutit Pillugit Ilisimasaqarfik Siunnersuisarfiutigisumit - tassa IPIS-imit oqaatigineqarpoq.
Naak angallanneq pissutigalugu marluk tikinngitsooraluartut maannamut tusilartut 16-it peqataapput, taakkua saniatigut ilaallutik, annertuumik innarluutilinnut ingiortit marluk kujataaneersut, Nuummi tusilartut peqatigiiffianit, SIUTEQ-mit ataaseq, IPIS-imilu sulisut marluk.
Tusilartut naapiisimaarneranni nukalersaasoq 22-nik ukioqartoq utoqqaanersaallu 65-inik ukioqarpoq.
-Taamaattumik oqarsinnaavugut ukiormanna peqataasorpassuusut, peqataasullu ilaat ukiut arlallit peqataasimanngeriarlutik ukioq manna naapisimaarnermi peqataaqqilermata, tamanna naapeqatigiittussanut assut nuannaarutigineqarpoq, peqataasullu imminnut takummaalluarlutik, IPIS-imi tusilartunut siunnersorti, Henriethe Malakiassen oqarpoq.
Naapisimaarnermittaaq pingaarnertut ilaatigut sammineqassapput, kulturisorneq aamma højskolemi iliniartitsoq suleqatigalugu isiginnaartitsisusiornerit. Tamatuma saniatigut tusilartut ataasiakkaarlugit oqaloqatigineqassapput.
- Tusilartut inuttut atugarisaat pillugit qanimut ataasiakkaarlugit misissuineq ingerlatissavarput, misissuinerup siunertarivaa, tusilartut ullutsinni inooqataanerminni atukkatigut qanoq inissisimanerat IPIS-imit paaserusunneqarmat, misissuinerullu inerneri aallaavigalugit IPIS-imit tusilartut atugarisamikkut kaammattorluarnissaat siunnersorluarneqarnissaallu siunertarineqarmat, misissuinermilu paasisat aallaavigalugit tunaartaqarnerulluta suliniuteqarluarsinnaanissarput IPIS-imit pingaartipparput, IPIS-imi immikkut siunnersorti, tusagassiortorlu Bikki P. Kleist oqarpoq.
Naapisimaarnermi ilaatigut pingaarnertut nunaqarfimmeersut illoqarfimmeersullu ataasinngornermit tallimanngorneq ilanngullugu programmeqarlutik naapisimaassapput. Naapisimaarnerlu IPIS-imit ataqatigiissaarneqarpoq.
