Innarluutit Pillugit Ilisimasaqarfik Siunnersuisarfiutigisoq
Kristian Josefsen, 61-nik ukiulik, 2005-mi tappingerpoq.Tappiitsoq: Tappiitsut attaveqaateqartariaqarput
Tappiitsut inuuniarnermikkut atugarisaat ilungersunarsinnaasarput tamannalu nammineq isigisaqartuulluni takorlooruminaassinnaasarpoq, taamaattumik tappiitsut annertuumillu isigiarsuttut ataatsimoorlutik aalajangersimasumik attaveqaasiornissaat, tappiitsut ilaannit orniginartinneqarpoq.
Tappiitsoq Krisitian Josefsen IPIS-imit pulaarparput. Ini angerlarsimaffiusoq isikkivigissumiippoq inissaqarluarlunilu, torerpoq pisattallu aalajangersimasumik inissititerneqarsimallutik. Inimi issiavik aalajangersimasumik inuttaqarpoq inuttullu pisariaqartitat oqarasuaatit, sikaratsit, raadiumut aquut assigisaallu takussaapput taakkulu tamarmik immikkut tigoriaannanngorlugit ilitsivilersorneqarsimapput.
Nummiu, Kristian Josefsen 61-nik ukiulik 2005-mi tappingerpoq. Kristiaat nammineq inigisaqarpoq, saniatigullu tapersersorteqartarpoq angerlarsimaffimmilu ikiorteqartarluni, ukiullu tallimat matuma siorna persuttarterujussuarnerup kingunerisaanik tappingerpoq.
Tappiitsut attaveqaateqartariaqartut
Kalaallit Nunaanni tappiitsut annertuumillu isigiarsuttut katillugit 30-t missaanniipput, taakkunannga pingajorarterutaat Nuummi najugaqartuullutik.
- Kalaallit Nunaanni tappiitsut illoqarfigisaminni attaveqaateqarnissaat pisariaqarpoq soqutiginarlunilu, aatsaat uanga IPIS-i aqqutigalugu paasivara Nuummiinnaq tappiitsut annertuumilluunniit isigiarsuttut taama amerlatigisut, taamaattumik attaveqaateqarnissarput pisariaqartupilussuuvoq, Kristian Josefsen oqarpoq nangillunilu:
Tappiitsut atugarisaaasa avataanit paasineqarnerulernissaat, pitsanngorsaafigineqarnissaat ataqatigiissaarneqarnissaallu pisariaqartupilussuuvoq, inuttut allatulli Naalagaaffiit Peqatigiit aalajangersagai naapertorlugit, innarluutillit allanut naligitinneqarlutik assigiimmik periarfissaqartinneqarnissaat pillugu aalajangersagaqarpoq, taamaattumik pisinnaatitaaffitta ersarissartuarnissaat pingaaruteqarpoq. Attaveqaasioqartoqassagaluarpallu uanga inuttut nammineq kajumissutsinnik peqataanissannut tunuarsimaarnanga soqutiginnippunga.
Periarfissat killeqartut
Naak isigisaqarsinnaanngikkaluarluni, Kristian Josefsenip ullutsinni pissutsit qanimut malinnaaffigisuuai, isummersornissaminullu tunuarsimaartuunani.
- Angerlarsimaffiga sungiusimasuuara annerusumillu nammineersinnaasarlunga, kisianni tassa tapersersorteqartuarnissara ikiorteqartarnissaralugu pinngitsoorsinnaasanngilakka. Ikiortit tapersersortillu taarseraappallaarunnaarnissaat tappiitsunullu sullissinissamut ilisimasaqarnerulernissaat pisariaqarlunilu aaqqiisoqartariaqartoq, Kristiaat isumaqarpoq.
-Kisimiillunga aneersinnaanera killeqarmat tapersersorteqarlunga aatsaat aneertarpunga, ullormulli aneersinnaanera killeqartarpoq, tapersersorteqartarnera ullormut akunnerit arfineq-pingasut ataallugit taamaallaat periarfissaasarmat, tamannalu ilaatigut nakeriallannarsinnaasarpoq ingammik arfininngorneq sapaallu tapersersorteqarneq ajorama- periarfissat killeqalertarput, siusinaartumik sulisinnaajunnaarnersialik, Kristiaat oqarpoq.
Kristian Josefsen aamma isumaqarpoq, Kalaallit Nunaanni pisuinnaat aqqutaat ikaarissallu Qallunaat Nunaannisulli tappiitsunut tulluussarlugit suliarineqartuugaluarpata tamanna pitsaanerusimassagaluartoq.
- Immaqa kisima anisalersinnaassagaluarpunga, nunatsinni inuit pisuinnaat aqqutaat sinaakkusersorlugit sananeqarsimanngillat ikaarissallu tappiitsunut naleqqussangaanatik, taamattumik ”Uagut tappiitsuusugut silarsuarput” pillugu isiginiarneqarnissarput paaseqqunaqaaq, Kristiaat oqarpoq.
Kiserliorneq taarsiornerlu
- Persuttarneqarnerma kingunerisaanik tappingernera ilungersunarsimaqaaq, kamak takkuttarpoq, apeqquterpassuillu takkussuussinnaasarlutik. Kiserliortillunilu eqqarsaatit nuanninngitsut takkussinnaasarput, tappingerlunimi suna tamarmi isigisaq taartuusarmat tamanna artornartaqaaq. Tappiitsuulluni suna tamarmi taartuusarpoq, inuttullu taarsiulernermi soorlu taarsiorneq qalleqqinneqartuusisarpoq nanertuutillu annertusisarlutik.
-Inuttut taamatut inissisimaleraangama eqqarsaatit nuannersut eqqarsaatiginiarsarisarpakka pattarujuuleraangamalu soorlu nukissanik nutaanik tuneqqinneqartarlunga, Kristian Josefsen oqarpoq nangillunilu:
Tappiitsunut attaveqaasiortoqartuuppat tappiitsut atugarisaat suleqataasinnaanerallu ammaanneqartuuppat tamanna pitsaassagaluaqaaq, taamaattumik tamatsinnut iluaqutaasussamik pilersitsinissaq tunuarsimaarfiginngilara, Kristian Josefsen oqarpoq.
