Nukissanik aallerfik

Utoqqarnut isumassuiffiup sammisassaqartitsiviani ulluinnarni atuisartut ikiliartunngitsut sammisassaqartitsivimmiittarnertik iluaqutigisaqaat. Amerlanerillu nukissamik aallerfittut misigisaraat, IPIS-imit pulaarnitsinni paasivarput.

Jens Ostermann siusinaartumik sulisinnaajunnaarsialik:
- Ippiarsuup Sammisassaqartitsivianiittarneq assut nuannareqaara 2008-miilli maannamut ullut tamaasa sapinngisannguara tamaat maannarniartarpunga, ilami oqarsinnaavunga manna tassaavoq nukissanik aallerfik, Jens Ostermann oqarpoq.
Sammisassaqartitsivimmiittartut atuisut imminnut qanigisariilertarput.
- Maaneeqatigisartakkakka kammalaatitut ikinngutitullu isigaakka ilami allaat ilaqutariittulluunniit immitsinnut isigisarpugut, taamaattumik maannaqqinnissannut qilanaartuaannarpunga, Jens Ostermann oqarpoq.

Maria aamma Paulus Nikolajsen, utoqqalinersiallit:
- Maaniittarnerput nuannareqaarput, sapinngisamik ullut tamaasa maanngarniartarpugut. Sammisassanut assigiinngitsunut uingalu peqataalluartarpugut. Qanorli aasakkut asiartunut ilaasinnaasaraluaruma qanoq nuannertigissagaluarpa, Marie oqarpoq.
Mariep uia, Paulusip nuliani ulloq unnuarlu kisimi tapersersortarpaa, ataasinngornikkut sisamanngornikkullu ikiorteqartarlutik. -Naak qaamanimininnguaq isigilaarsinnaagaluarlugu oqarsinnaavunga isikka pitsanngoriartunnginnamik tappiillinikuullunga, taamaattumik tapersersorteqartuarnissara pisariaqartippara, Marie Nikolajsen oqarpoq.

Mathæus Vahl aamma Jakob Nielsen, siusinaartumik sulisinnaajunnaarnersiutillit:
- Inunnik allanik naapitaqarusullunga maannartarpunga, tamannalu uannut iluaqutaasaqaaq, Mathæus oqarpoq nangillunilu: Sisamanngornermi tallimanngornermilu maannartarpunga, Sammisassaqartitsivimmilu sammisassaaleqiffiunngimmat eqaarsaarujoortarpunga. Timeralu aalatissimagaangakku ila inuummarinnartaqaaq, Mathæus Vahl oqarpoq.
- 1990-kkunnili Sammisassaqartitsivimmiittalerpunga, maanittarnera ajorinngilara aamma inunnik allanik naapitaqalaarnissara angorusullunga maannartarpunga, Jakob Nielsen oqarpoq.