Innarluutilinnut pisariillisaasoqarnialerpoq

Innarluutillit atuisut periarfissagissaarnerulernissaat anguniarlugu Nunatta Atuagaateqarfia tappiitsunut, isigiarsuttunut atuarsinnaanngitsunullu atorniartartunut pitsanngorsaanialerpoq.

Tappiitsut, isigiarsuttut atuakkanillu atuarsinnaanngitsut atuffassissutinik kassettebåndinut immiussanik atorniarsinnaasarput, Nunatta Atuagaateqarfia teknikkikkut pisariillisaaniarluni maanna nutarterilersoq, Nunatta Atuagaateqarfia pisortaq, Elisa Jeremiassen oqarpoq.

- Kalaallisut atuagarpassuit kassettebåndimut immiussat nuna tamakkerlugu atorniarneqarluartuusarput, kisianni aamma båndininik atuisut ikiliartorput, amerlanerit cd-eertalinnik radioqartitileriartormata,kassettebåndillu mianersuutinngikkaanni imusinnaasarput, taamaattumik pisariillisaaniarluta kassettebånderpassuit cd-nngortinneqarnissaat sulissutigaarput, Nunatta Atugaateqarfiani pisortaq, Elisa Jeremiassen nassuiaavoq.

Båndit oqaluttuaannanngorartarsinnaapput

Kalaallisut atuagarpassuit kassettebåndimut immiussat Dansk Blindesamfundi suleqatigalugu suliarineqarsimapput, båndillu atuffississutit sineriak tamakkerlugu atorniarneqarluartuummata cd-iinngortitsinissamut atatillugu 400.000 koruuninik Namminersorlutik Oqartussat aningaasaliipput.

- Atuagarpassuit kassettebåndimut immiussat cd-iinngortinneqarnissaannut misilittaasoqareerpoq, oqarsinnaavungalu teknikkikkut tamanna periarfissaalereermat, kisiannili piginnittussaanermut tunngatillugu suliaq suli ingerlavoq, tamannalu naammassineqariarpat båndit atugaanerat siunissami oqaluttuaannanngorartarsinnaavoq, Elisa Jeremiassen oqarpoq.

Innarluutillit atugarisaat eqqumaffigineqarput

Nunatta Atuagaateqarfia 1976-imi sananeqartoq, illoqarfiup qeqqani inissisimavoq, maannalu 20-t missaannik sulisoqarluni. Ulluinnarnilu atuisartorpassuaqartarmat innarluutillit atuisinnaanissaat eqqumaffigineqarpoq.

- Innarluutillit Nunatta Atuagaateqarfianiissinnaanissaat anguniarlugu innarluutilinnut tulluarsakkamik perusuersartarfeqarlunilu elevatoreqarpoq, aamma isaariaqarpugut kaassuartagarsortunut atorneqarluarsinnaasumik, taamaattumik innarluutillit Nunatta Atuagaateqarfianiissinnaanissaannut pingaartitsivugut pitsanngorsaaqqinnissamullu ammalluta, Nunatta Atuagaateqarfiani pisortaq, Elisa Jeremiassen oqarpoq.

Nunatta Atuagaateqarfiata nittartagaa: www.katak.gl