Innarluutit Pillugit Ilisimasaqarfik Siunnersuisarfiutigisoq
Suleqatigiissitaq susassaqarfinni assigiinngitsuneersunik inuttaqartoq IPIS-i ataqatigiissaarisoralugu pilersinneqartussanngorpoq. ADHD-eertut inuusuttut ilaat, meeqqat atuarfianiikkunnaarsimasut inuttut ajornartorsiulersinnaasartut periarfissagissaarnerulernissaat anguniarlugu nunalu tamakkerlugu suliniuteqarfigineqarniassammata suleqatigiissitaliortoqartoq, IPIS-imit ataqatigiissaarisoq, Peter Abelsen oqarpoq.
Periarfissaavoq ingerlallualernissaat
- ADHD-imik innarluutillit ilaat inuttut unittoortuusillutik ajornartorsiuteqarsinnaasarput, ilaqarpulli aamma silassorissunik ilinniagaqarnerullu tungaasigut ingerlalluartunik, IPIS-imi siunnersorti suleqatigiissitamilu ataqatigiissaarisoq, Peter Abelsen oqarpoq nangillunilu:
Inuusuttut ADHD-eertut ilaat inersimasut silarsuaannut ikaarsaaleruttorfiup nalaaniittut – tassaakkajuttarput meeqqat atuarfiiniikkunnaarsimasut, taakkulu sammisassatigut, ilinniarfissatigut suliffissatigullu periarfissagissaarnerunissaat inuuniarnikkullu atugarissaarnerulernissaat anguniarlugit suliniuteqarnissaq siunnerfigineqarpoq.
Attuumassuteqartut peqataaffigineqarput
IPIS-ip ataqatigiissagaanik suleqatigiissitaq Kommuneqarfik Sermersuumit, MIPI-mit, Nuummi ADHD-ertut atuarfiannit – Heldagsskolemit aamma Isumaginninnermut Naalakkersuisoqarfimmit- Ulloq Unnuarlu Angerlarsimaffiit immikkoortortaqarfiannit Nuummi februaarip 17-anni ataatsimeeqqaarnermi peqataaffigineqarpoq.
Ataatsimiinnermi oqariartuutigineqartut aamma ilagivaat, ADHD-eertut ataqatigiissaakkamik suliniuteqarfigineqarnissaat pisariaqartupilussuusoq.
- ADHD-eertunut attuumassuteqartut allat aamma peqatigalugit naapeqqinnissaat alloriarfigineqartussanngorpoq, siunissamilu nuna tamakkerlugu ataqatigiissaakkamik suliniuteqartoqalernissaa suliniarnissami pingaarnerpaavoq, Peter Abelsen oqarpoq.
