Nutaarsiassat

            Angerlarsimaffik ”Palleq”-miit aasaanerani nutaarsiassat:

            Angallatitaarneq:

            23. maj 2010 angerlarsimaffik angallatitaarpoq najugaqartunit sulisunillu nuannaarutaalluarlunilu iluaqutigineqarlualertumik.

            Nammineq pisaanik katersanillu imminut pilersornerulernissamut periarfissaqarnerulerput. Eqaluit, saarulliit kuannillu iluaqutigineqarluarput.

            Najugaqartut sulisullu kangerluup iluani, Eqalunnut aasaanerani asiaqatigiipput, pilersaarutaavorli najugaqartut kingoraartaallutik ullut pingasukkaarlugit asiarsimaarnissaat.

            Folketingimit, borgmesterimit kommunimilu ilaasortanit pulaarteqarneq:

            12. juni 2010 Danmarkimi folketingimit angalatitanit 13-iusunit, kommuneqarfiup Sermersuup borgmesterianit Asii Chemnitz Naarup-imit, Paamiuniillu kommunalbestyrelsimut ilaasortanit angerlarsimaffik Palleq pulaarneqarpoq.

            Aasaanerani sammisassat:

            Sammisassaqartitsivik ”Nuilaaq” juli tamaat aasaanerani matoqqammat, najugaqartut assigiinngitsunik illup iluani, silami asimilu sammisassaqartinneqarput.

            Asi højskole 26. juli – 4. august 2010:

            Paamiut Asasara-mit aaqqissuussamit najugaqartut aasaanerani ulluni 10-ni Asi Højskolertitsinermut peqataaniarput.

            Ilaatigut sammineqartussaapput; ikiueqqaarnerit, piniuserineq, piliniarneq, inooqatigiinneq, aavarneq aliikkusersuinerillu assigiinngitsut.

            Angerlarsimaffik ”Palleq”-mi najugaqartut sulisullu aasarsiorluarnissaannik kissaapavut.