Qiteqqakkut ajoquserneq. Paraplegi. Tetraplegi.

Qiteqqakkut ajoquserneq. Paraplegi aamma tetraplegi.

(Para (gr.), nutserneqarsinnaavoq: ataatigut, imal. saniatigut. Plegi (gr.), nutserneqarsinnaavoq, nukillaarneq, imal. susinnaajunnaarneq.)

(Tetra-plegi, nutserneqarsinnaavoq: nissut tallillu illuttut nukillaarneri.)

Qiteraq qarasaq ilanngullugu sianiutini qitiupput. Qiteraq qimerluup iluaniippoq pukutsup nalaaniit makisiup tungaanut. Assersuunneqarsinnaavoq allunaamut takisuumut, sianiuteqarfiullunilu ujalussiaasartaqarluni, qaratsap timimi amermut, nukinnut pisattanullu attaveqaatigisaanik.

Qiteqqakkut ajoquserneq ajutoornikkut qimerluup pukutsulluunniit napineratigut, imaluunniit qiteqqami nappaateqalernikkut pigajuppoq. Qiteraq ajoqusersimappat timip ilaani nukillaartoqassaaq ajorunnaarsinneqarsinnaanngitsunik.

Ajoquserneq pukutsumut qaninnerujartortillugu nukillaarnerit amerliartorsinnaapput.Ajoquserneq tamakkiisuusarpoq sianiutit ujalussiaasat qiteqqamiittut tamarmik malugisaaruppata, tassa ajoquserfimmiit timip sinnera nukillaartarmat. Nukillaarnermi aalasinnaaneq malugisaatillu eqqugaasarput. Ajoquserneq aamma ilaannakuusinnaavoq, taamalu nukiit ilaat malugisaatillu ilaat ajoquserfiup ataaniittut atorsinnaallutik.

Qiteqqamikkut ajoqusertut amerlanersaat kørestoleqartariaqalersarput. inigisaallu immikkut ittumik naleqqussarneqartariaqartarluni.

Paraplegi

Paraplegi taaguutaavoq pukutsup ataaniit qiteqqami ajoquteqarnermut. Ajoqusernerup qanoq qutsitsigisumiinnera apeqqutaalluni nissut uppatillu nukillaarsimassapput. Kiat ajoqusersimasanngilaq amerlanertigut. Aammattaaq nakasuk, erlaviit atoqateqarsinnaassuserlu nukillaarsimasarput. Paraplegi’mik ajoqutillit amerlanersaat ulluinnarni imminnut isumagisinnaapput, avatangiisit qanoq issutsimut naleqqussarneqarsimappata. Ikiorteqarnissaq pisariaqarsinnaavoq.

Tetraplegi taaguutaavoq qimerluup qutsinnerusuani, pukutsumi, ajoqusersimagaanni. Nissuni. Timimi tallinilu/assannilu nukillaartoqarsimassaaq. Ajoquserneq qungatsip nagguaasa sisamaata qulaaniippat anersaartuuteqarnissaq pisariaqarsinnaavoq. Taamattaaq nakasuk, erlaviit atoqateqarsinnaassuserlu nukillaarsimassapput. Tetraplegi’mik ajoqutillit ulluinnarni isumagisassanut, soorlu uffarnissamut, atisalersornissamut, nerisassiornissamut il.il. ikiorneqartariaqassapput.

Qimerluk ajutoornikkut napisimagaangat pilatsinnissaq pisariaqarajuppoq. Tamanna Islandimi Danmarkimiluunniit Rigshospitalimi pisarpoq. Pilatsinnikkut qiteraq suliarineqarsinnaanngilaq napisimasulli pissusissamittut imminnut nippunnissaat qulakkeerneqarsinnaavoq. Ajoqut napparsimanerup kingunerisimappagu, napparsimmavimmi sivisujaamik uninngareernermi aatsaat nukillaarnermut peqqutaasoq paasineqarsinnaasarpoq.

Qiteqqap ajoqusernerata kingorna sungiusaaqqinneq sivisusarpoq immikkullu ilisimasaqarfiusariaqarluni. Hornbækimi katsorsaavimmi Klinik for Rygmarvsskader ingerlanneqartarpoq.