"Tupatortut puaat"

KOL sunaava?

KOL tassaavoq puatsigut anigorsinnaanngisamik ippigusuuteqarneq.

KOL-eraanni anersaartuutit pullalersarput ippigusuutigineqalerlutillu, nuaqarnerulerneq immaqalu aamma puanni pullartaaraaqqat (alveolit, puanni anersaartuutit noorpiaanniittut) ajoquserneri. Nakorsaat pitsaanerpaaq tassaavoq pujortarunnaarneq. Pujortarunnanngikkaanni nappaat sukkasuumik ajornerulissaaq. KOL-imik nappaatillit tamarmik misigissavaat ilungersuanikkut issanngusarnertik arriitsumik ajorsiartuaarnera, tamatumunnga pissutaaginnarluni puammik utoqqaliartuaartuunerat. Taamatut ingerlanerup pakkersimaarutigissavaa nakorsaanerit nutaat, soorlu pujortarunnaarneq, sungiusarneq aamma puannik nakorsaatit.

KOL-imik nappaatillit quliugaangata arfineq-pingasut missaat ukiorpassuarni tupatortuunertik napparsimassutigilersarpaat, kisianni ilaasa napparsimassutigilersarpaat puannik ajoqusiisinnaasunit allanit sunneneqarnertik pissutigalugu - assersuutigalugu suliffeqarfianni pisunit.

Danmarkimi inuit KOL-ertut 430.000-it missaaniipput, tassalu innuttaasut 10 % missaat. Ajuusaarnaraluartumik nappaat taanna aatsaat ajorseriivinnerani malugineqarajuttarpoq. Tamatuma nakorsaanissamut periarfissat annikillisittarpai. Nappaatip takkukkiartuaarnera pasitsaassassarpiaanngilaq. Aallaqqaammut nappaat malunnarpianngitsunik ersiuteqartarpoq. Aallarnisaatigigajuppai ullaakkut quersorneq imaluunniit anersaartorniaarsaarneq, ilungersuanermi issannguneq.

Sooq KOL-ertoqalertarpa?

• Pujortarneq KOL-imut pissutaajunerpaavoq. Nappaatip qanoq sakkortutigineranut apeqqutaavoq qanoq annertutigisumik qanorlu sivisutigisumik pujortartuusimaneq.

• Silaannaap mingutsinneqarnera KOL-imik ajorseriaataasinnaavoq.

• Alfa 1-antitrypsinimik amigaateqarneq aamma KOL-eqalertisinnaavoq. Nappaat taanna kingoruttagaavoq qaqutigoortuunerullunilu, tassungalu pissutaavoq ensymi alfa 1-antitrysin tingummiit pinngorfigisamiit siaruartitsisinnaanermik piginnaasaqannginneq.

KOL qanoq misiginartuua?

• Quersorneq ullut tamaasaarsinnaasoq.

• Anertikkarneq

• Qiseq kinertoq iggiamiit kaanngartikkuminaatsoq. Qanoq qisissaqartigineq apeqqutaavoq silap qanoq innera immaqalu aamma marniliuuttoorsimaneq.

KOL-eqalerneq nakorsap qanoq paasisarpaa?

KOL pinaveersaarneqarsinnaallunilu nakorsarneqarsinnaavoq, puaalli sananeqaatimikkut innarlerneqarsimappata KOL nakorsarneqarsinnaaneq ajorpoq. Assigiinngitsutigut katsorsaanikkut ersiutit iluaallatsinneqarsinnaapput akornutillu malittaasut pinaveersaartinneqarsinnaallutik.

• Pujortarunnaarneq katsorsaanermi pingaaruteqarnerpaavoq. Piffissaagallartillugu unitsinneqaruni nappaat ajorseriarnavianngilaq!
• Allat pujortarnerannit sunnertinneq pinaveersaartariaqarpoq aamma kissarsuutit qisussianik ikumatitsiviit mingutsitsinerat ippinnartuusinnaavoq.

• Silaannarmik mingutsitsiffioqisumi najugaqaruit tamatumunnga illersorniarlutit suna tamannguat iliuuseqarfigiuk .

• Tamaani silaannaq mingutsitaavallaarpat pujoralappallaarpalluuniit allamik suliffissarsiornissat isumaliutigiuk.

• Silaannaap kissassusaata allanngupallattarnera ingalassimajuk imaluunniit silami nillertumi isugutattumilu aneernaveersaarit.

Qanoq iliuuseqarsinnaavit?

Illit puatit qanoq pissuseqarnersut misissortikkumallugit nakorsat attaveqarfigiuk aamma siunnersortikkit nakorsartillutillu.

• Pujortartuuguit taava unitsiguk - kingusinaartoqanngisaannarpoq.

• Avatangiisinni ippigusunnartut - soorlu pujoq aamma pujoq tipittoq - ingalassimakkit.

• Peqqinnartunik allanngorartunillu nerisarit.

• Timit aalatinniartaruk eqaarsaartarilluunniit.

• Upernaat tammasa pualluummut kapitittarit.

• Pujortartut pujuliornerat ingalassimajuk.