Parkinson-imik nappaateqarneq

Parkinson qaratsami nappaataavoq anigorneqarsinnaanngitsoq. Nappaat siullermik nassuiarneqarpoq nakorsamit tuluusumit James Parkinson-imik 1817-imi. Qaratsami sananeqaatsit ilaannit dopaminimik taaneqartartumik amigaarteqalernermik pissuteqarpoq. Sananeqaat taanna nalinginnaasumik aalaaseqassagaanni pigisariaqarpoq.

Nappaat utoqqasaajunerusunik eqquisarpoq inuusunnerilli aamma eqqugaasinnaasarput. Inuit 1000-iugaangata ataaseq nappaammik eqqugaasarpoq.

Nappaat sumik peqquteqarpiarnersoq ilisimaneqanngilaq ilimagineqarlunili kingornuttagaasoq aammalu avatangiisit sunniinerannik peqquteqarsinnaasoq.

Nappaatip ilisarnaatai pingaarnerit ukuupput:

• Timimi sajunnerit
• Nukiit qeratasuut
• Sukkaatsumik aalaaseqarneq

Nappaat aaliangiunneqassappat nappaatip ilisarnaatai marluk minnerpaamik atuutissapput. Nappaat timip illuatungaani aallarteqqaartarpoq kingornalu timip sinneranut siaruarluni.

Nappaatip ilisarnaatigisinnaasai allat tassaapput: kiinarsornermik annikillisitsineq, nipimik atuinermik annikillisitsineq, qisissaqarpallaarneq, attatinik attasiisinnaannginneq, manngertitsineq, qasoqqaneq sinissaaruttarnerlu.

Nakorsap sianiutinut tunngasumik immikkut ilisimatusarsimasup nappaat Parkinson suussusersisarpaa. Nunatsinni nakorsat sianiutinut immikkut ilisimatusarsimasut, neurologit, ukiumut ataaseq imaluunniit marloriarlutik tikittarput.

Inuit ilaasa Parkinson-imik napparsimasut eqqaamasaqarniarnertik nutaanillu ilinniarniarnertik ajornartorsiutigilersarpaat.

Eqqarsartaatsikkut akornuteqalerneq aamma nappaammut ilaasinnaasarpoq. 20% -it missaasa puigortunngorneq aqqusaartarpaat.

Katsorsartinneq nakorsaatitornikkut pisarpoq. Pingaaruteqarpoq timip sungiusartittuarnissaa.

Tagiartuisartup imaluunniit timimik pillorissaasup qanoq timip sungiusartarnissaa aammalu ikiuutaasinnaasut atorneqarnissaat siunnersuuteqarfigisarpaat. Taamaattunik atorfeqartoqanngippat kommunerisami napparsimmavik siunnersuisinnaasarpoq.