Isigiarsunnerit assigiinngitsut, napparsimanermit, ilalisarnermit, avatangiisinit, ajutoornernit utoqqalinermilluunniit tunngaveqarsinnaapput.

Isigiarsuttoqartarpoq

· isarussanik uuttortakkanik imaluunniit kontaktlinsenik atuinermi ersarissumik isigisinnaaneq 6/18-iuppat tassanngaluunniit ajornerulluni

· isigisaq takussaasoq 20º-mik minnerusumilluunniit nerukillisimappat

· qaratsap piliaanik isigiarsunneq, isigisamik paasinnissinnaaneq eqqaamannissinnaanerlu ajornakusuulersimappata.

Ersarissumik isigisinnaaneq atorneqartarpoq soorlu atuarnermi assassornermiluunniit, imaluunniit ungasianiit arlaannik takunninniaraanni. Ersarissumik isigisinnaaneq allattarfiit atorlugit uuttortarneqartarpoq, inersimasunut naqinnerit atorlugit, meeqqanullu ilisarnaatit atorlugit.

Nalinginnaasumik meterit arfinillit ungasitsigisumiit, ungasissumut isigisinnaanermut uuttuisoqartarpoq, kiisalu 25-40 cm-isut ungasitsigisumiit, atuarnermi isigisinnaanermut uuttuisoqartarluni.

Titarneq 6/6, allattarfimmi titarnerit alliit ilaaniittoq, takusinnaagaanni tappissuseq nalinginnaasarpoq.

Titarneq 6/18 tassanngaluunniit qutsinnerusumiittut takusinnaagaanni tappissuseq appasittarpoq. Tassa nalinginnaasumik tappissusillit 18 meterisut ungasitsigisumiit takusinnaasai, aatsaat 6 meterisut ungasitsigisumiit takuneqarsinnaammata.

Isigisaq takussaasoq tassaavoq isit illugiit isigitillugit allamut nikisinngikkaluarlugit isigisinnaasaq – nalinginnaasumik 180°-sarpoq. Isigisaq takussaasoq avatangiisitsinni sumiissusersiniaraangatta atortarparput. Isigisap takussaasup qiterpiaannaa takusinnaagaanni qinnguartarnermi isigisaqarnermut assersuunneqarsinnaavoq.

Qaratsap piliaanik isigiarsunneq tassaavoq isigisat suunerinik qaratsap paasinnissinnaanerata annikillisimanera peqanngivinneraluunniit. Tassalu takusat pillugit paasinnissinnaassutsip eqqaamannissinnaassutsillu ajoquteqarnerat. Misissuinikkut takuneqarsinnaavoq tappissuseq nalinginnaasoq ajornerulaartorluunniit.

Annertuumik innarluutillit ikiorserneqartarnerat pillugu, inatsisit naapertorlugit Kalaallit Nunaanni ikiorsiisoqarsinnaasarpoq, isigiarsuut isarussanik, kontaktlinse-nik pilattaanikkulluunniit malunnaataasumik ikiorserneqarsinnaanngippat.

Nappaatit isigiarsunnermut peqqutaasinnaasut

Retinitis pigmentosa (RP) isit nappaatigaat kingornunneqarsinnaasoq, isip ameraasaata ilorliup kigaatsumik ajorsiartorneranik kinguneqartartoq. RP taartumi tappiinnertut aallarteriarluni isigisap takussaasup nerukilliartuaarneranik, qalipaatinik isigisinnaanerup ajorsiartorneranik, isigisat ajortikkiartornerannik naggataatigullu amerlanerit tappiillinerannik kinguneqartarpoq. RP ullumikkut ajorunnaartitsisinnaasumik katsorsaatissaqartinneqanngilaq.

Opticus atrofi isit nappaatigaat isit sianiutaannik eqquisartoq. Annikitsumiit annertuumik isigiarsulernermik kinguneqartarpoq ukiut ingerlanerini ajorsiartulaarsinnaasumik. Ullumikkut opticus atrofi ajorunnaarsitsisinnaasumik katsorsaatissaqartinneqanngilaq.

Grøn stær aamma taaneqartartoq Glaukom nappaataavoq isip erngata naqitsineranik qaffatsitsisartoq. Tamanna isit sianiutaannik ajoqusiisinnaavoq isigisarlu takussaasoq nerukillisissinnaalluni. Suliaritinngikkaanni tappiillissutaasinnaavoq. Katsorsaaneq tassaasarpoq soorlu nakorsaatit atorlugit naqitsinerup annikillisinnera. Katsorsaaneq inuuneq naallugu atuutissaaq isigisaarunnermullu iluaqutaasinnaanngilaq.

Macula Degeneration utoqqarni isit nappaatigaat, ersarissumik isigisinnaanermik atuarsinnaanermillu ajortunngortitsisartoq. Nappaat katsorsarneqarsinnaanngilaq, tappiinnerulernissarli annikillisinneqarsinnaavoq. Macula Degeneration-imut pujortarneq ajornerulersitsisarmat, pujortarunnaarnissaq inassutigineqartarpoq.

Isinut katsorsaasumut, tappiitsunut isigiarsuttunullu siunnersortimulluunniit nakorsiarnissamut periarfissat.

Ullumikkut Kalaallit Nunaanni aalajangersimasumik isinut katsorsaasoqanngilaq. Danmarkimiit ukiumut arlaleriarlutik Kalaallit Nunaanni peqqissaavinnut tikeraartoqarsinnaasarpoq. Sinerissami peqqissaaviit, kiisalu Dronning Ingrids Hospital tikeraarneqartarput. Illoqarfigisami nakorsaq, isinut katsorsaasumut innersuussisarpoq.

Namminersorlutik Oqartussat, Isumaginninnermi Naalakkersuisoqarfik aqqutigalugu, Danmarkimi Synscenter Refsnæs, meeqqanut inuusuttunullu isigiarsuttuusunut, annertuumik innarluutilinnut ikiorsiisarnermi inatsisit naapertorlugit ikiorsiivigineqartartunut, siunnersortaanissamik isumaqatigiissusiornikuupput.

Siunnersuineq oqarasuaatikkut, najuunnikkulluunniit ingerlanneqartarpoq. Synscenter Refsnæs-mi ilinniartitsisunit, perorsaasunillu, immikkut isigiarsuutinut ilinniagaqarsimasunik siunnersuineq ingerlanneqartarpoq.