Innarluutit Pillugit Ilisimasaqarfik Siunnersuisarfiutigisoq
Huntingtons chorea (chorea (grækerit oqaasiinit) qitik (tapaq), qitinneq (taparneq) uani attuumassuserneqarsimalluni Huntingtons chorea-mik napparsimalersimasut akulikitsunik allorarneq, qitaasannerlu ilisarnaatigisarmassuk.))
Huntingtons chorea sianiutini nappaataavoq ajorsiartuaartartoq. Piumassuserinngisamik timimi tamarmi nukiit aallariasaartarput. Inuk imminut erfagiuttutut qissallariartutullu aalariartarpoq, napaniarnerlu ajornartorsiutigisinnaallugu.
Huntingtons chorea’mik nappaateqartuusup pisuttaasia aalariaasialu ilaanni aalakoortup pissusilersorsinnaaneranut eqqaanarsinnaasarpoq.
Nappaat kingornuttagaavoq kromosom nr. 4-mi allanngortoqarneranik peqquteqarluni. Sananeqaat, gen’i, nappaatilik kingornussimagaanni piffissap ingerlanerani napparsimasoqalissaaq. Inuup napparsimalersimasup nappaamminik kinguaaminut ingerlatitseqqiisinnaanera 50%-iuvoq. Gen’i napparsimasoq piginerlugu misissortittoqarsinnaavoq.
Napparsimanermut misigissutsitigut ersiutaasinnaapput inuttut periutsit allanngornerisigut, eqaamasaqarsinnaanerup annikillineranik, sorusussuseerunnikkut, napparsimanermik takunnissinnaannginnikkut, uumisoqqajaanertigut isumatsangaarnermillu nanertisimalernikkut.
Napparsimalersimasoq oqalunniarnikkut ajornartorsiuteqarsinnaavoq kingornatigullu aamma iisiniarnermigut ajornartorsiuteqalerluni. Piffissap ingerlanerani puigortunngortoqartarpoq.
Nappaat 35-40 missaanik ukioqarnermi malunniuttarpoq, napparsimalernermiillu toqunissamut agguaqatigiissillugu ukiut 15-it missaannik inuusoqartarpoq.
Ullumikkorpiaq Huntingtons Chorea katsorsaatissaqartinneqanngilaq, nappaatilli timikkut, sianissutsikkut misigissutsikkullu malunniutai ikiorserneqarsinnaapput.
Nappaat inuusunnerusuni aammattaaq nalaanneqarsinnaasarpoq, 20-liinginnermi takkussinnaasoq. Sukkanerusumik ingerlaarsinnaasarpoq. Noqartarneq (epilepsi) takussaasarpoq. Huntingtons chorea-mik nappaatillit akornanni, inuusunnerumaat 3 – 10 %-iisa atugarisinnaasarpaat.
