Naartup imigassartorpallaarnerup kinguneranik ajoqusertarnera

(Qallunaatuumiit: Føtalt Alkohol Syndrom - FAS)

Ilisimatusarnikkut uppernarsineqarnikuuvoq imigassamik atuineq naartumut ulorianarsinnaasoq. Naartunerup nalaani imigassartortarnerup meerartaassaq innarlersinnaavaa. Innarliutit tassaasinnaapput pissusilersortarnerit innarlerneqarnerat qaratsamilu allanngortoqarnera.

Qallunaat Nunaanni peqqinnissaqarfimmiit innersuussutaasartut, Nunatsinni naartusut naartulerusuttullu imigassartortassannginnerinik innersuussutigineqartarput.

Imigassap qanoq annertutigisumik atorneqarnera apeqqutaalluni naartu sunnerneqartarpoq.

Imigassap qanoq annertutigisumik atugaanera inummiit inummut apeqqutaalluni ajoqusiineq pisarpoq.

Imigassartorpallaarnerup kingunerisaanik naartup ajoquserneqartarneranut ilisarnaataasinnaapput:

• Inunngornermi kingornalu mikivallaarneq
• Qaratsami sianiuteqarfiup innarlersimanera ilaatigut pissusilersortarnerup ajoquteqalerneranik eqqarsartaatsikkullu kingusittuunermik kinguneqartartoq
• Kiinnap isikkuata immikkuullarissuunera (isit, qaneq kiinnallu ilusaa)

Naartup imigassamik ajoqusernera meeqqamut innarluutigineqartutut aaliangiunniarnerani qulaani ilisarnaataasinnaasutut pineqartut pingasut tamarmik takussutissaasariaqarput.

Qaratsap innarlerneqarnerata saniatigut isit, siutit, uummat, aqajaroq, inalukkat, quup aqqutaa, nukiit saarngillu innarleqqasinnaasarput.

Meeraq misigissutsinik aqukkuminaatsitsisinnaasarpoq avatangiisiminillu immersorneqarsinnaanini killeqartittarlugu. Misigissutsillu annertunngitsuinnarmik pigisinnaasarpaat.

Naartunermi imigassartortarsimanerup annikinnerusumik takussutissalimmik malitseqartarnera pisimasinnaasarpoq. Meeraq ilikkagaqarniarnermini ajornartorsiuteqarsinnaasarpoq, aallaamasuusinnaalluni aalaatsinillu ajornartorsiuteqarsinnaalluni. Ersiutit taamaattut akuttunerusarput. (Qallunaatuumiit: Føtal Alkohol Effekt - FAE).

Innarluut aaliangiunneqartarpoq pasitsaanneqaraangat meeraq nalinginnaasumik ineriartunngitsoq, immikkut ittumik isikkoqaraangat, oqippallaarluni inunngorsimagaangat arnaatalu naartunermi imigassartortarsimanera ilisimagaanni.

Naartup imigassamik ajoqusersimaneranik ilisarnaataasartut, imaluunniit naartup imigassamik sunnerneqarsimaneranik kingunerisinnaasai innarluutaapput ataavartut katsorsarneqarsinnaanngitsut.

Meerarpassuit imigassartorpallaarnerup kingunerisaanik innarluuteqalersimasut paasineqarneq ajorput, innarluutilli allat paasineqartarput soorlu: uummatip qaratsallu ajoquteqarnerat, ADHD, iliuutsit ajoquteqarnerat, qilaaqannginneq aammalu tarnikkut eqqarsartaatsikkullu innarluuteqarnerit.

Meeqqat naartunermi ajoqusersimanermik innarluuteqalersimappata immikkut ittumik kaammattornissaat, sungiusarnissaat, tapersersornissaallu pisariaqarsinnaasarpoq, anerlarsimaffimmi, sunngiffimmi aturfimmilu.