Ersiorneq

Ersiorneq

Kialuunniit ersineq misigisimavaa. Nalinginnaavoq navianartorsiornermi imaannaanngitsumilluunniit ernumanermi ersiortoqartarnera. Ersineq annilaanganerluunniit nalinginnaasoq misigissusaavoq illersuutaasoq mianersortariaqarnermullu kalerriutaasoq.

Nappaatigalugu ersiorneq piviusunik tunngaveqanngilaq. Tassa inuit ataasiakkaat sianissusaanni eqqarsaatitut takorluukkatullu pilersarpoq. Tamanna inummut tarnikkut, timikkut inooqataanikkullu erloqinartorujussuusinnaavoq. Ersiorneq tarnikkut nappaatini nalinginnaanerpaat ilagaat.

Ersiorneq timikkut (ersiutitigut) anersaakkullu ersiutitigut malunniuttarpoq. Timikkut ersiutit tassaasinnaapput uummammik kassuttoorneq, sajunneq, uissannguneq, kiakkerneq, qimilersutut misigineq naarlunnerlu. Tarnikkut ersiutaasinnaapput najummatsernartumik tamaviaarneq, toqunissamut niaqulaalernissamulluunniit annilaanganeq, annilaanganeq piviusuunngitsumilluunniit misigisimaneq. Ersiornerit assigiinngitsut arlaqarput. Pingaarnerit pingasut tassaapput:

• Fobi (Grækerit oqaasianit: Phobia = ersineq, qununeq) tassaavoq pisuni aalajangersimasuni ersinermik misigisarneq, tamannalu inummut taama misigisumut allaat paasiuminaalluinnartutut misinnartarpoq. Fobi’mik misigisaqarnermi nalinginnaanerit tassaapput: Sumiiffinni ammaannartuniinnissamut, inoqatit akornanniinnissamut, terissanut, aasiannut, timmisartornissamut, kigutilerisumut, kallermut ininilu matoqqasuniinnissamut ersinerit.

• Panikangst tassaaneruvoq tassanngaannartumik ersiulersarneq.

• Nalinginnaasumik ersineq, ersinermik, ernumanermik annilaanganermillu malunniutit atugaajuarnerusut.

Ersiorneq aamma tarnikkut nappaatinut, soorlu skizofreni’mut nanertisimanermullu, ilaasinnaapput.

Ersiornermut peqqutaasut

Ersiornermut peqqutaasut sorpiaanerat ilisimaneqanngilaq. Amerlanertigut meeraanermi atukkat oqimaatsut pissutigalugit ersiornissamut qajannassuseq kingornuttagaq inuunermiluunniit kingusinnerusumi atukkat oqimaatsut pissutaasinnaapput.

Ersiorneq imaangajaarnartut assigiinngitsut atorlugit annikillisinneqarsinnaavoq, soorlu imigassaq, hashi, nakorsaatit eqqissisaatit assigisaallu. Taamaammat atornerluisunngortoqarsinnaavoq. Aamma killormut atornerluinikkut ersineq pilersinneqarluniluunniit ajornerulersinneqarsinnaavoq.

Katsorsarneqarneq

Ersiornermik misigisarnerit oqinnerusut paasissutissiineq, siunnersuineq ikorfartuinerlu atorlugit katsorsarneqarsinnaapput.

Tarnikkut peqqissaaneq, soorlu pissusilersuutinut tunngasumik peqqissaaneq, atorlugu katsorsaasoqarsinnaavoq. Tassani katsorsagaq annikitsumik ajoqutiginngisaanillu ersinermik misigitilaarneqartarpoq. Taamattaaq kognitiv terapi iluaqutaasarpoq, tassa eqqarsaatit misigissutsillu ersinermut tunngasut sammillugit iliuuseqarfiginerisigut.

Tamakku saniatigut ersiornermut malunniutit nakkutigisinnaalernissaannut sungiusaatit, soorlu qanoq anersaartornissamut tunngasut ersinerup akiornissaanut iluaqutaasarput.

Aamma nakorsaatit atorlugit katsorsarneqarnissaq pisariaqarsinnaavoq.