Innarluutit Pillugit Ilisimasaqarfik Siunnersuisarfiutigisoq
Elektiv isumaqarpoq: immikkut toqqagaq. Mutisme isumaqarpoq: oqajuitsuuneq.
Elektiv mutisme, oqalussinnaannginneq tassaavoq inoqatit akornanni nalinginnaasumik akulerussinnaannginnermik peqquteqartumik ajoqut. Meeqqat taamatut inissittut nalinginnaasumik oqalussinnaagajuttaraluarput ingammik angerlarsimaffimminni. Kisiannili meeqqanut paaqqinnittarfinni atuarfimmiluunniit oqaasseqartuussanatik.
Taamatut inissinneq sivikinnerpaamik sapaatip akunnerinik sisamanik sivisussuseqartussaavoq. Elektiv mutisme aallartittarpoq meeqqap pingasuniit arfinilinnik ukioqarnerata nalaani. Niviarsiaqqat atornerusarpaat. Meeqqat elektiv mutismillit, oqalukkunnaarnikut, ernumasuullutillu ittoortuusinnaasarput, anaanaminnullu annertuumik atasuusinnaallutik.
Oqalukkunnaarneq, elektiv mutisme, pingaaruteqarpoq immikkoortissallugu allanik peqquteqarluni oqalukkunnaarnermut naleqqiullugu. Mutisme, oqaaseqarunnaarneq, meeqqani inersimasunilu autismeqartuni ilaannilu aamma skizofreneqartuni aamma takussaasarpoq. Tusillanneq aamma oqaluppiarunnaarnermut peqqutaasinnaasarpoq.
Oqaaseeruttunut katsorsaatigissallugu pitsaanerpaaq tassaavoq sukkaatsumik meeqqap oqaloqittalernissaa anguniarlugu inooqataatillugit sungiusaraanni. Tarnip pissusaanik immikkut ilisimasallit ilaqutariit tamaasa akulerutsillugit oqalunnermik sungiusaaneq ingerlattarpaat.
Meeqqat amerlanersaasa alliartornerminni oqaatsitik tigoqqittarpaat , naak innarluut ukiorpassuarni malunniuteqqasinnaagaluartoq.
