Dystoni - Nukiit sukaqqanerlunneri

Dystoni

Dystoni isumaqarpoq ”nukiit sukaqqanerlunneri”. Dystoni malunniuttarpoq timip ilaani, qaqutiguinnarlu timimi tarmarmi, nukiit piumassuserinngisamik aalariarlutillu eqittalernerisigut. Dystoni qaratsap ilorpasinnerusuani inuup nukingisa aalaasiinik aqutseqataasumi allanngortoqarneranik peqquteqarpoq. Allanngornernut peqqutaasut amerlanertigut ilisimaneqanngillat.

Meeqqani dystoni inersimasuniit allaanerusarpoq. Kingornuttagaagajuppoq malunniutillu, pingaartumik nissuni aallartittut, timip ilaanut allanut siaruaannissaat ilimanaateqartarpoq. Inersimasuni dystoni amerlanertigut timip ilaani aallartiffimminiiginnartarpoq.

Torticollis

Torticollis isumaqartoq ’niaqqup piumassuserinngisamik allamut saqinera’, timip ilaani, qungatsip nukiini, dystoni’lernermut ilisarnaatit nalinginnaanersaat.

Nukiit eqinnerisa, qungaseq niaqorlu sanimut, siumut, tunummulluunniit saqitittarpaat.

Niaqoq nikiallattarluni saqiartuaartarpoq, piffissallu ingerlanerani ataasiinnarmut sammilersarluni.

Niaqqup taamaannera kanngusuutigineqarsinnaavoq ”allaasutut” misigisimalluni, inoqatillu akornanniinnissaq ingalassimaniarneqarluni.

Katsorsaaneq

Nappaat dystoni katsorsarneqarsinnaanngilaq, nakorsaatilli (iisartakkat) assigiinngitsut iluaqutaasinnaapput.

Aamma Botox’imik (botulinum toksin) nukinnut eqqugaasunut kapuuilluni katsorsaasoqarsinnaavoq. Taama katsorsaaneq Danmarkimi pisarpoq Kalaallit Nunaanni napparsimaveqarfiup innersuussineratigut, timillu ilaani dystoni’mut, soorlu torticollis’imut, iluaqutaasinnaalluni. Timimik tagiartuilluni peqqissaaneq aamma tapertatut katsorsaataavoq pingaarutilik.