Innarluutit Pillugit Ilisimasaqarfik Siunnersuisarfiutigisoq
Mulitipel Sclerose aamma taaneqartarpoq Dissemineret Sclerose imaluunniit taaneqaannartarpoq Sclerose. Nunarsuarmioqatigiit innarluummut tassunga taaguutaat: Multipel Sclerose atorneqarnerulernikuuvoq.
Multipel Sclerose nappaataavoq atajuartoq/anigorneqarsinnaanngitsoq. Qaratserfimmi sianiuteqarfik eqqorneqartarpoq /saassunneqartarpoq. Uanilu qiteralik aamma qarasaq innarlerneqartarlutik.
Multipel Sclerose sumerpiaq peqquteqarluni innarluutinngortartoq ilisimaneqanngilaq, isumaqartoqarlunili kingornussisaatinut tunngassuteqartoq.(Genetiske faktorer) Inuup imminut illersorsinnaanerata ajoquteqalerneranik tunngaveqarsorineqartarpoq, ilimagineqarlunilu virusip nappaat aallartittaraa.
Nunani akunnattumik klimalinni, Europap Amerikkallu avannaani nappaat takussaaneruvoq, nunani kiattuni takussaannginnerulluni. Arnat angutinit akulikinnerusumik Multipel Sclerose innarluutigilersarpaat.
Innarluummut ilisarnaatit 20-iniit 40-rut tungaannut ukioqarnermi aallartikkajuttarput.
Napparsimalerneq assigiinngitsorujussuarmik ingerlasarpoq, aallartissutigigajuttarpaali sukkasuumik saassunneqartutut ilillluni napparsimalerneq ullualunniit sapaatip akunnerini arlalinni atuussinnaasartoq.
Napparsimalernermut ilisarnaataagajupput qasoqqaneq, timip nukillaanganera, nukillaartutullu timip pissuseqarnera. Timimi sianiutit innarleqqasinnaapput assersuutigalugu timip ilaani kakikkalaarnertut ittumik misigisaqarneq atuussinnaasarluni. Isiginiarneq ajornartorsiorfiusinnaavoq ersarlulluni, isigiarsulluni marloqiusamilluunniit isigisoqarsinnaalluni. Eqqaamasaqarniarneq ukkissiniarnerluunniit ajornartorsiutaasinnaasarput.
Quisarnerlu ajornartorsiutigineqarsinnaalluni.
Innarluut/ nappaat paasineqartarpoq ataasiarluni marloriarluniluunniit qaratsakkut misissortereernerup kingorna. MR imaluunniit CT scanning (qaratsamik tarrarsuineq) imaluunniit qiteralimmiit tigusilluni misissuineq atorlugu nappaat paasineqartarpoq.
Innarluutip qanoq annertutigisumik alliartornera assigiinngitsumik atuuttarpoq, kinguneriuartarluguli piginnaasat annikilliartornerat. Ukiut tallimat qulillu ingerlareernerisa kingorna aatsaat innarluutip kingunerilerumaagai iluamik paasineqartarput.
Aaqqissutissanik nakorsaateqanngilaq taamaattorli nappaatip annikinnerusumik malunniunnissaa anguniarlugu nakorsaatitortoqarsinnaalluni.
Imminut ikiorsinnaajumalluni sungiusartuarneq pisariaqartuuvoq. Innarluuteqalernermi ikiuutaasartut siunissami pisariaqalersinnaanerat naatsorsuutigisariaqarpoq.
