Afasi tassaavoq oqalussinnaajunnaarneq, inuit taamatut innarluuteqalersimasut siusinnerusukkut nalinginnaasumik oqaaseqartuusaraluarput.

Afasi pilersarpoq qaratsami oqaatsit qitiusumik pinngorarfiisa aqunneqarfiat innarlerneqarsimagaangat. Qaratsami taqqakkut milittoorneq aanaartoornerluunniit (apoplexi) imaluunniit tinuneqalersimaneq [1], allatulluunniit qarasaq innarlerneqarsimagaangat , oqalussinnaajunnaarneq afasi innarluutigineqalersarpoq.

Afasi assigiinngitsunut arlalinnut immikkoortinneqartarpoq aammalu sakkortussutsit assigiinngissinnaasarlutik.

Oqaatsinut tunngasortai immikkoortunut marlunnut avinneqarsinnaapput. Qaratsami oqaatsinut tunngasumik immikkoortumi siullermi aappaaniluunniit ajornartorsiortoqarsinnaasarpoq.

Oqaatsini aninniakkani ajornartorsiutit:

- oqalunneq

- taasiniarneq

- allakkatigut nalunaarniarneq

Oqaatsini isaasuni paaserusutani ajornartorsiutit:

- oqaatigineqartut paasiniarneri

- atuarniakkat paasiniarneri.

Afasi-p katsorsarneqartarnera:

Afasi-mut tunngaviusoq katsorsarneqaqqaartussaavoq. Assersuutigalugu: aanaartoorneq imaluunniit tinuneqalerneq.

Eqqugaasut ilaat ingerlaannangajak tamakkiisumik annikinnerusumilluunniit oqalussiinnaaleqqittarput, ilaasali oqalussinnaaneq sukkaannerusumik tigujartuaartarlugu.

Oqalunnermik ilinniartitsisup[2] paasiniartarpaa afasi qanoq ittoq atorneqarnersoq, taannalu aallaavigalugu oqalunnermik ilinniartitseqqinneq, oqalunnermillu sungiusarneq ingerlattarlugu.

Kalaallit Nunaanni oqalunnermik ilinniartitsisumit misissortinnissaq ilinniartitaanissarlu killeqartorujussuuvoq.

Afasi (oqaaseerussimaneq) atuutsillugu attaveqarniarnermut siunnersuutit pitsaasut:

· Malugissutsit[3] tamaasa atukkit. Imaasillugu: oqaatiginiakkat, tusartitassat imaluunniit malugisassat takuneqarsinnaanngorlugit.

· Oqaloqateqarnissannut piffissaqarit.

· Oqaloqatit isaatigut toqqarlugu isigiuk.

· Oqaluttoq akornuseqinagu aatsaallu ikioqqusoqarpat ikiuullutit.

· Sammisat[4] aaliangersimasut toqqakkit, soorlu ulluinnarni atuuttut, aammalu oqaaseqatigiit naatsunnguit atukkit.

· Nipi nalinginnaasoq atorlugu sukkaatsumik ersarissumillu oqalugit.

· Oqalunninni timit atoruk ussersortarlutillu aammalu oqaluuserisat tikkuartarlugu.

· Afasi –mik eqqorneqarsimasut ilaasa akuersaarnissartik itigartitsinissartilluunniit nalornissutigisarpaat, taamaattumik pineqartup timaa isigalugu paasiniarsariuk.

· Oqaloqateqarnermi assilissat, skemat, ullorsiutit titartakkallu atorlugit iluaqutaasarput.