Meeqqanik inuusuttunillu ikiorsiisarneq

Meeqqat annertuumik innarluutillit angajoqqaaveruttut: Aallaaviussaaq, meeqqat nalinginnarmik inuusut assigalugit, meeqqanik inuusuttunillu ikiorsiisarneq pillugu peqqussut tunngavigalugu, ilaqutariinnut paarsassanngortinneqarsinnaapput, angajoqqaavissiartaartinneqarsinnaallutik, pisariaqarpalluuniit ulloq unnuarlu paaqqinniffimmut inissinneqarsinnaassapput. Meeqqap annertuumik innarluuteqartuunera tunngavigalugu, ikiorsiiniutit nalinginnaasut naammanngippata, aatsaat annertuumik innarluutillit pillugit inatsisini ikiorsiinissamut periarfissat atorneqarsinnaasarput.

Meeqqat annertuumik innarluutillit isumagineqarnermikkut sumiginnagaasut: Aallaaviussaaq, meeqqap allatuulli isumagineqarnikkut sumiginnagaasimasutulli, meeqqanik inuusuttunillu ikiorsiisarneq pillugu peqqussut tunngavigalugu, ikiorserneqarnissaa toqqammaviummat. Taamaattorli ikiorserneqarnissamik pisariaqartitsineq qaqugukkut pissutsinik inuttut atugarisatigut qaqugukkullu innarluuteqarnermik pissuteqarnersoq killileruminaassinnaavoq. Pissutsit akuleriissimagajuttarput.

Angajoqqaajusut meeqqaminnut pilersuisinnaanerminnik, paaqqutarinnissinnaanerminnilluunniik isumaginnissinnaanngippata, sumiginnaappataluunniit, meeqqanut inuusuttunullu ikiorsiisarneq pillugu peqqussut ikiorsiinissamut toqqammaviussaaq.

Meeraq innarluuteqarsimappat, inuttut atugarisai salliullugit isiginiarneqartariaqartassaaq, innarluuteqarneralu tunulliuttariaqassallugu, soorlu isumaqaraanni meeqqap innarluuteqarnera pissutaalluni sumiginnarneqarsimasoq.

Angajoqqaajusut meeqqami pisariaqartissinnaasannik qarsupitsiinnartut, inuttut ajornartorsiornertut taakkartorneqartariaqarpoq, taamaattumillu meeqqanut inuusuttunullu aningaasartuutissatut kommunimit isumagineqartussaalluni.

Meeqqap innarluuteqarnini pissutigalugu, piffissamik, naammagittarsinnaanermik, nukissanik, immikkut ilisimasariaqakkanik, avatangiisinik immikkuullarissunik imaluunniit immikkuullarissumik katsorsartinnissamik piginnaanngorsaqqinnissamilluunniit angajoqqaajusut tunniussaqarnissaminnik piginnaasakippata inorsarsimassappatalu, annertuumik innarluutillit pillugit ikiorsiisarnermi inatsisit atorneqarsinnaanngortarput.