FN innarluuteqarnerlu

Naalagaaffiit Peqatigiit (FN-ip) nalinginnaasumik aalajangersagai, annertuumik innarluutilinnut atugassarititaasut pillugit, qallunaatut oqaasertalersorneqarsimasut, Danmarkimi "Det centrale Handicapråds"-ip internet-imi nittartagaani takukkit.

"Innarluutillit allanut naligitinneqarlutik assigiimmik periarfissaqartinneqarnissaat pillugu, Naalagaaffiit Peqatigiit tunaartarisassatut malittarisassaat", Naalagaaffiit Peqatigiit 1993-imi ataatsimeersuarneranni akuerineqarput.

1996-mi Nunatsinni Inatsisartut ukiakkut ataatsimiinneranni isummat, Naalagaaffiit Peqatigiit tunaartarisassatut malittarisassat imarisaat malillugit sulisoqassasoq isumaqatigiissutigineqarpoq.

Tunaartarisassatut malittarisassat naalakkersuinermik ingerlatsinikkut anguniagassat makkuupput:

• Inunnut innarluutilinnut naligiisitsinermik periarfissanillu assigiinnik pilersitsinissaq,
• Innarluutillit pisaraqartitaasa pisinnaatitaaffiisalu eqqumaffigineqalernissaat,
• Katsorsaanermik, piginnaanngorsaaqqiinermik tapersersuiniutinillu allanik qulakkeerinninneq,
• Nalinginnaasumik inuuneqarnerup ilaanut tamanut, ineqarnikkut allatigullu avatangiisitigut, paasissutissiisarnikkut, ilinniartitaanikkut, suliassaqartitaanikkut, ilaqutariittut inuunermi, kulturikkut, sunngiffimmi sammisassatigut, timersornikkut, upperisarsiornikkullu peqataasinnaanissamut periarfissaqalersitsineq.

Naalagaaffiit Peqatigiit tunaartarisassatut malittarisassaanni, innarluut tassaatinneqarpoq innuttaasunut allanut naligitinneqarluni inuiaqatigiit inuuneranni peqataanissamut periarfissanik annaasaqarsimaneq, killeqalersimanerluunniik. Killeqalersimaneq inummi pisinnaasakillisimasumiittuaannanngilaq - inuiaqatigiinniilluarsinnaallunili, avatangiisini inuit pisinnaasamikkut assigiinngissinnaanerannut naleqqussarsimanngitsuni.