Isumaginninnermut Naalakkersuisoqarfiup ukioq manna uge 41-mi meeqqat innarluutillit ilaqutaallu qitiutillugit sammineqartussatut toqqarsimavaat.

Meeraq inoorlaaq annertuumik innarluuteqartoq paasineqarpat imaluunniit meeraq nappaateqalerpat ajortoorpalluunniit innarluuteqalernermik kinguneqartumik, taava ilaqutariinnut tamanna qanoq sunniuteqartarpa?

Pisortat ikiorsiissutinik assigiinngitsunik tapersiisinnaapput aammali pisussaaffigalugu, kisianni tamatuma ilaqutariit taarsersinnaanngilai, taamaattumik pingaaruteqarpoq, meeqqanut ikiorsiinermi ilaqutariit paaqqinniffillu/kommunelu imminnut qanimut suleqatigiilluarnissaat. Meeqqap innarluutaanut aamma immikkut pisariaqartitaanut paasinninneq, innarluutaanullu immikkut attuumassuteqartumik siusissukkut iliuuseqarneq ilanngukkaanni, tamanna meeqqap ineriartorneranut siunissamilu periarfissaanut aalajangiisuusinnaavoq.

Uagut innuttaasutut inuiaqatigiittullu meeqqamut innarluutilimmut ilaqutaanullu qanoq qisuariartarpugut? Peqataatinnissaannut ilaginissaannullu inuiaqatigiinni suleqataallutik ilanngutsinnissaannut periarfissittarpagut? Imaluunniit nalligiinnartarpagut - taamaattussaannartullu isigalugu?

Illoqarfinni meeqqat innarluutillit ilaquttatillu qanoq atungassaqartinneqarpat? Pitsaaqutit ajoqutillu immikkut suut naapitassaappat? Illoqarfinni meeqqanut innarluutilinnut ilaqutaannullu akimmiffiusinnaasut qanoq allanngortinniarsinnaavaat?

Meeqqat tamarmik isumassorneqarnissaq sianigineqarnissartillu pisariaqartippaat, kisianni meeraq innarluutilik immikkut mianerisassaavoq, immikkorluinnaq eqqumaffigisassaalluni aamma ilaquttaminnit allaniillu, qanigisaminillu annerusumik maluginiagassaalluni. Tamatuma amerlanertigut kingunerisarpaa, ilaqutariit innarluutilittallit ullortik pilersaarusiortariaqartarmassuk meeraq eqqarsaatigalugu.

Innarluutillit sapaatip akunneranut atatillugu sammineqartussamut attuumassuteqartunik suliniutinut sammisaqartitsinissamullu taperneqarnissamik qinnuteqarnissamut Isumaginninnermut Naalakkersuisoqarfimmut periarfissaqarpoq, qinnuteqarnermi immersugassaq immersorneqarsinnaavoq, Quppernerup talerpia-tungaani imaluunniit www.nanoq.gl -mi aaneqarsinnaavoq.

Qinnuteqaat naalakkersuisoqarfimmi kingusinnerpaamik 27. september 2010 tiguneqareersimassaaq.

Isumaginninnermut Naalakkersuisoqarfik, Box 970, 3900 Nuuk, Fax: 324298