December 2009

Uani quppernermi innarluutillit pillugit nutaarsiassaasinnaasut ilanngunneqartassapput.

Ukiumut nutaamut iserluaritsi.  (29.12.2009)

Neriuppugut tamassi juullisiorluarsimasusi. IPIS imiit ukiumut nutaamut iserluarnissassinnik kissaappassi aammalu neriulluta ukioq nutaaq pitsaasumik tamanut angusaqarfiulluni ingerlajumaartoq.

IPIS pisortatigoortumik ammarpoq 7. december 2009. Innarluutit pillugit siunnersuisarneq ingerlalernikuuvoq. Ukiumut nutaamut aamma iseriarutta annertunerusumik tusagassiutit atorlugit saaffigineqartarnissarput neqeroorutigissavarput.

Maannamut nittartakkatsinni innarluutit assigiinngitsut suunersut takuneqarsinnaalerput, tamakkiisuunngikkaluartumik ikkussuivugut aammalu ikkussukkat siunissami amerliartorumaarput. Innarluutit nittartakkatsinni takuneqarsinnaasut tassaapput Nunatsinni innarluutit atugaasut ilaat.

Innarluutit nittartakkatsinniittut pillugit annertunerusumik ilisimasaqarusukkussi attavigisinnaavatsigut taava ilisimatitsillutalu siunnersuiumaarpugut.

Nittartakkatsinni aamma oqalliffinnik pilersitsisoqarsinnaavoq. Oqalliffiit innarluutilinnit ilaqutaasunit sulisuusunilluunniit ilaaffigineqarsinnaapput. Oqalliffinni ilaarusukkaanni akuersissummik IPIS imut saaffiginninnikkut piniartoqarsinnaavoq.

Innarluutilinnut ilaqutaalluni namminerluunniit innarluuteqartuulluni inuuneq kiserliornarsinnaasarpoq, taamaattumik oqalliffiliornertigut kiserliornerit millisinneqarsinnaapput tassami innarluutinut atukkanut, ilaqutaasulluunniit atugaannut, paaseqatigiinneq inuunermik oqinnerulersitsisinnaasarpoq. Assersuutigalugu tarnikkut innarluutillit imaluunniit ADHD mik innarluutillit namminneq ilaqutaasulluunniit oqalliffimmut ilanngukkusullutik saaffiginnissinnaapput. Saaffiginnittut isissutissamik immersueriarlutik akuerineqarunik ilaasortanngorsinnaapput.

Aamma DVD nik naatsunik paasiuminartunillu kalaallisut suliarineqarnikunik peqarpugut innarluutit ukua pillugit: ADHD, Skizofreni aammalu aanaartooreernerup kingorna nukillaarneq. Taakkununnga innarluutinut attuumassutillit DVD it piniarlugit uagutsinnut saafffiginnissinnaapput.

Ataani saaffissat ilannguppagut.

Ukiumut qaangiuttumut qujalluta ukiortaami pilluaqquassi.

(08.12.2009)  Ulloq taanna aallarnerfigalugu  kikkulluunniit innarluutit pillugit ilisimasanik paasiniaarusuttut aammalu
 siunnersoqqusut saaffiginnissinnaanngorput telefonikkut, email - ikkut, faxikkut allakkatigulluunniit.

<

Naalakkersuisoq Maliina Abelsen

ammaanersiornermi oqalugiarpoq.

oqalugiaat takuuk

Tusilartut pikkorissarput

Piffissami kingullermi innarluutilinnut pisoq nuannersoq tassaavoq tusilartut Nuummi katersuutsinneqarnerat,taannalu novemberimi ingerlanneqarpoq .
Tusilartut katillugit 17 it Kitaaniit Tunumiillu katersortinneqarput qarasaasiamillu atuinermik ilinniartinneqarlutik.
Taamaasillutik avammut attaveqarnerat pitsanngorsarneqarpoq allanullu ajornannginnerusumik attaveqarsinnaanerat paasiniaasinnaanerallu aqqutissiuunneqarluni.
Illoqarfimminnut utereernerup kingorna tusilartunut siunnersorti aqqutigalugu pikkorissarsimanerat malinnaavigineqartussaavoq.